mariiz-e-muhabbat u.nhii.n kaa fasaanaa
sunaataa rahaa dam nikalate nikalate
magar zikr-e-shaam-e-alam jab_ki aayaa
chiraaG-e-sahar bujh gayaa jalate jalate

iraadaa thaa tark-e-muhabbat kaa lekin
fareb-e-tabassum me.n phir aa ga_e ham
abhii khaa ke Thokar sambhalane na paa_e
ki phir khaa_ii Thokar sambhalate sambhalate

are ko_ii vaadaa Kalaafii kii had hai
hisaab apane dil me.n lagaa kar to dekho
qayaamat kaa din aa gayaa rafataa rafataa
mulaaqaat kaa din badalate badalate

u.nhe.n Kat me.n likhaa ki dil muztarib hai
javaab un kaa aayaa muhabbat na karate
tumhe.n dil lagaane ko kisane kahaa thaa
bahal jaa_egaa dil bahalate bahalate

hame.n apane dil kii to parawaa nahii.n hai
magar Dar rahaa huu.N ye kamsin kii zid hai
kahii.n paa_e naazuk me.n moch aa naa jaa_e
dil-e-saKat_jaa.N ko masalate masalate

vo mahamaa.N hamaare hu_e bhii to kab tak
hu_ii shammaa gul aur na Duube sitaare
'qamar' kis qadar unako jaladii thii ghar kii
vo ghar chal diye chaa.Ndanii Dhalate Dhalate