dil apanaa mayakashii kaa talabagaar bhii nahii.n
haa.N wo agar pilaaye.n to inkaar bhii nahii.n

ahad-e-wafaa kii subaho kaa kyaa zikr dosto
ahad-e-wafaa kii subaho ke aasaar bhii nahii.n

suunaa pa.Daa hai der se mayaKaanaa-e-wafaa
saaqii kaa zikr kyaa ko_ii mayaKaar bhii nahii.n

gulashan ujaa.D ho gayaa duniyaa badal ga_ii
kyaa Dhuu.NDhate ho gul ke yahaa.N Kaar bhii nahii.n

'darshan' na puuchho zulmat-e-duniyaa-e-aashiiqii
ko_ii charaaG ab to sar-e-daar bhii nahii.n